Bildu Soraluze

Udal gobernuaren lana oztopatzea izan zen EAJ eta PSE-EE alderdien zinegotziek aurreko legealdian eduki zuten helburu politikoa. Aurtengo hauteskundeen ostean, politika egiteko modu arduragabe horrekin bukatzeko garaia zela ulertuta, Bildutik elkarlanerako proposamena luzatu genien bi alderdi horiei. Gobernu-taldearen osaketa zein batzordeburuen izendapenak guztien artean banatzeko proposamena luzatu genien horretarako. Ezezko erantzuna jaso ostean Bilduko zinegotziekin osatu genuen gobernu taldea.

Azken kapituloa Debabarrenako mankomunitaterako ordezkaria izendatzearekin ari gara bizitzen. Soraluzeko udalean eta mankomunitatean ordezkari bakarra duten inguruko herri guztietan gobernuan dagoen aldeardiaren ordezkariak izendatu izan dira beti mankomunitaterako. Ba orain EAJk eta PSE-EEk Iker Aldazabal izendatu nahi dute soraluzeko ordezkari mankomunitatean. Zein da horretarako arrazoia? Ba Zubietako erraustegirako Bilduk proposatutako moratoriaren kontrakotasuna bermatzea debabarrenako mankomunitatean.

Baina hara non gure herrian oraindik ordezkaria izendatu gabe badago ere, beste herrietako ordezkariak uztailean izendatu zirenez dagoeneko martxan da mankomunitatea. PSE-EEko ordezkari bat izendatu dute lehendakari, eta mankomunitatean gehiengo absolutua daukate PSE-EEk eta EAJk.

Ondorioz, moratoriaren aurkakoek gehiengoa ziurtatuta daukate jadanik mankomunitatean. Beraz, ze lortu nahi dute Ikerren izendapenarekin? Ba argi dago, udal gobernuaren lana oztopatzen jarraitzea.

Politika egiteko modu arduragabe horrekin Bilduko ordezkarioi lana zailduko digutela dudarik ez dago. Baina benetan kaltetzen dutena Soraluzeko herria eta ondorioz herritarrak dira.

Gu ahaleginduko gara bizi dugun egoera ekonomiko larri honetan ahalik eta modurik arduratsuenean jokatzen, eta benetan estimatuko genuke udaleko beste zinegotziek ere laguntzeko borondatez egingo balute beraien jardun politikoa.

Bildu Soraluzeko zinegotziak

Alkatetzaren kagu hartze ekitaldia from Pil bideoak on Vimeo.

Plaentxia.com-ek grabatutako bideoa.

Maiatzaren 22ko hauteskundeetan Soraluzen alde nabarmenez irabazi ostean hainbat bilera egin ditugu EAJ eta PSE-EErekin herrian. Bilera horietan ondorengo proposamena aurkeztu diegu batari zein besteari:

Urte luzeetako gatazkak, ezin ulertuak… gainditzeko Bilduk apustu estrategikoa egin duela agerikoa da. Apustu hori egin izanaren ondorio da Bilduk Euskal Herrian hauteskundeetan jaso duen babes izugarria. Orain asmo horiek aurrera egin dezaten egoera ahalik eta egokien kudeatzea dagokigu.
Soraluzen ere garai berri hauetara egokitutako bidea jorratu nahiko genuke datozen lau urteetan. Argi dago bakoitzak badauzkala bere ezaugarri eta irakurketa propioak, baina orain arteko frentismo, horma eta ezinikusiak gainditzeko bidea egiteko prest gaude gu.

Horregatik ondokoa da bai EAJ zein PSE-EE alderdiei luzatzen dizuegun proposamena:

• Ez dizuegu ez batari eta besteari paktu proposamenik egingo. Ez dugu uste bata zein bestea aparte uzteko momentua denik.

• Bilduren herri programa izan da babesik handiena jaso duena. Gure asmoa programa hori garatzeko lau urtetako plan estrategiko bat egitea da datozen asteetan.

• Plan hori ordea ahalik eta aberatsen eta integralena izatea nahi dugu, horregatik EAJ eta PSE-EEtik egin dituzuen proposamen ahalik eta gehien ere sartu nahiko genituzke plan horretan. Promesa hutsala ez dela ikus dezazuen prest gaude ekainaren 11 aurretik konpromiso zehatzak hitzartzeko.

• Udaletxeko organoei dagokienez:

Gobernu Batzordean bakoitzari leku bana ematea proposatzen dizuegu. Osaketa: Bildu 2,  EAJ 1, PSE-EE 1.

Gure herri programarekin eta zuen ekarpenekin datozen lau urtetarako plan estrategikoa elkarrekin adostuko bagenu, ez dugu inolako arazorik batzordeak ere guztion artean banatzeko. Guretzat garrantzizkoagoa da zer egingo dugun, nork egingo duen baino.

Elkarlana da proposamenean eskaini dieguna bai batari zein besteari. Baina bilera hauek egin ostean oraingoz ez dugu lortu EAJk eta PSE-EEk proposamen honekin bat egiterik. Ikusteko dago zer gertatuko den ekainaren 11n, baina gertatzen dena gertatuta ere Bildu osatzen dugunok lanerako ilusio eta gogoz ekingo diogu legegintzaldiari.

BILDU BOZKATUENA SORALUZEN ETA GIPUZKOAN

Emaitzen Balorazioa

Soraluzen 2011ko maiatzaren 23an

BILDU SORALUZEk hauteskundeak irabazi ditu Soraluzen 880 botu lortuta (%41,43) eta lehenengo indarra izatea lortu du 5 zinegotzirekin. Gipuzkoan ere Bilduk jaso ditu boturik gehien, alde handiarekin gainera, 119.537 botu eta 22 batzarkide lortu ditu. Gipuzkoan dauden 968 zinegotzietatik 441 eskuratu ditu Bilduk.

Soraluzeri dagokionez, jasotako emaitzen inguruan egiten dugun balorazioa oso positiboa da hainbat arrazoirengatik:

• Soraluzetarrek azken legealdian Ezker Abertzaleak eta  EAk egindako lanaren balioa aitortu eta babestu dutelako.
• Bidean jarri dizkiguten oztopo denak gaindituz, udalgintzarako herritar talde eta programa bikaina osatzea lortu dugulako.
• Orain lau urte behin behineko aldaketa koiunturala zirudiena, egonkortzea eta sendotzea lortu dugulako.
• Euskal Herriko eta Gipuzkoako beste herri askotan bezala, Bilduk aurkeztutako zerrendak eta programak ilusioa piztu duelako soraluzetarren artean ere.
• Herriak berba egin du eta soraluzetarren gehiengo zabal batek Bilduri eman dio bere botua eta konfidantza.

Lehen indar politikoari dagoion moduan, datozen egunotan herrian ordezkaritza duten gainerako alderdiekin –EAJ eta PSEErekin- elkarrizketak hasiko ditugu. Gure programa mahai gainean jarriko dugu eta elkarlanerako izan daitezkeen aukerak aztertuko ditugu.

Gozatzeko momentua da baina momentu honetan gogoan ditugu kartzeletan eta herbestean dauden soraluzetarrak eta eskubide zibil eta politikorik barik laga dituzten ehunetik gora herritarrak. Etorkizunean ere herritar guztientzat eskubide guztiak lortzeko lanean jarraituko dugu.

Amaitzeko, eskerrak eman nahi dizkiegu euren languntza eta babesa eman diguten soraluzetar guztiei eta eta jakinarazi nahi diegu gure esku dagoen guztia egingo dugula herritarren nahia betetzeko.

BILDU SORALUZE